ന്യൂഡല്‍ഹി: ഫെയ്‌സ് ബുക്കിൽ പുതിയ അക്കൗണ്ട് തുറക്കാന്‍ ആധാര്‍ കാര്‍ഡ് വേണ്ടി വരുമെന്ന വാര്‍ത്ത നിഷേധിച്ച് ഫെയ്‌സ്ബുക്ക് രംഗത്ത്. ആധാറിലുള്ള പോലെ ഉപയോക്താക്കളുടെ പേര് ചോദിച്ചത് വെറുമൊരു പരീക്ഷണം മാത്രമായിരുന്നുവെന്നും ഫെയ്‌സ്ബുക്ക് വ്യക്തമാക്കി.ഇന്ത്യന്‍ ഉപയോക്താക്കളുടെ ആധാര്‍ വിവരങ്ങള്‍ ശേഖരിക്കുന്നില്ലെന്നും ചെറിയൊരു വിഭാഗം ഇന്ത്യൻ ഉപയോക്താക്കളില്‍ മാത്രമാണ് ഈ പരീക്ഷണം നടത്തിയതെന്നും ഈ പരീക്ഷണം മുന്നോട്ട് കൊണ്ടുപോവാന്‍ ഒരു പദ്ധതിയിട്ടിട്ടില്ലെന്നും ഫെയ്‌സ്ബുക്ക് ബ്ലോഗ്‌പോസ്റ്റില്‍ വ്യക്തമാക്കി.
ഫെയ്‌സ്ബുക്കിന്റെ ഇത്തരം പരീക്ഷണത്തെ കുറിച്ച് പ്രചരിച്ച വാര്‍ത്തകളൊന്നും ശരിയല്ല. ഞങ്ങള്‍ നടത്തിയ പരീക്ഷണം അവസാനിച്ചു. ആധാറിലേത് പോലെ പേര് നല്‍കിയാല്‍ അത് സുഹൃത്തുക്കള്‍ക്കും കുടുംബങ്ങള്‍ക്കും എളുപ്പത്തില്‍ തിരിച്ചറിയാന്‍ സഹായിക്കും എന്നുള്ള സന്ദേശം മാത്രമായിരുന്നു. ഞങ്ങള്‍ ആധാര്‍ വിവരങ്ങളൊന്നും ശേഖരിക്കുന്നില്ല. ഫെയ്‌സബുക്കില്‍ പുതിയ അക്കൗണ്ട് ഉണ്ടാക്കാന്‍ ആധാറിലേ പേര് വേണമെന്ന നിര്‍ബന്ധവുമില്ല.’ ഫെയ്‌സ്ബുക്ക് പ്രൊഡക്റ്റ് മാനേജര്‍ തായ്ചി ഹൊഷിനോ ബ്ലോഗ് പോസ്റ്റില്‍ പറയുന്നു.
യഥാര്‍ത്ഥ പേര് ഉപയോഗിച്ച് സൈന്‍ അപ്പ് ചെയ്യണമെന്ന് നിര്‍ദ്ദേശിക്കുന്നതിന് വേണ്ടിയാണ് ഈ പരീക്ഷണം നടത്തിയത്. ആരും ആധാര്‍ നമ്പര്‍ നല്‍കേണ്ടതില്ല. ആധാര്‍ കാര്‍ഡുമായി ബന്ധിപ്പിച്ചുള്ള വെരിഫിക്കേഷന്‍ പ്രക്രിയ ഫെയ്‌സ്ബുക്കിനില്ല.’ കമ്പനി വ്യക്തമാക്കി.
